കേരളത്തിലേക്ക് ആദ്യ 'ഫ്ലൈ ബസ്' സർവീസുമായി കർണാടക ആർടിസി

ബെംഗളൂരു: കേരളത്തിലെ വിമാനയാത്രക്കാർക്കും ഐടി ജീവനക്കാർക്കും ഏറെ ആശ്വാസമേകി കർണാടക ആർടിസിയുടെ ആദ്യ 'ഫ്ലൈ ബസ്' സർവീസ് കേരളത്തിലേക്ക് ...

ബെംഗളൂരു: കേരളത്തിലെ വിമാനയാത്രക്കാർക്കും ഐടി ജീവനക്കാർക്കും ഏറെ ആശ്വാസമേകി കർണാടക ആർടിസിയുടെ ആദ്യ 'ഫ്ലൈ ബസ്' സർവീസ് കേരളത്തിലേക്ക് പ്രയാണം ആരംഭിച്ചു. ബെംഗളൂരു കെംപെഗൗഡ അന്താരാഷ്ട്ര വിമാനത്താവളത്തിൽ നിന്നും കോഴിക്കോട്ടേക്കാണ് കർണാടക ആർടിസി ഈ പുതിയ ലക്ഷ്വറി സർവീസ് തയാറാക്കിയിരിക്കുന്നത്.

വിദേശത്തുനിന്നും മറ്റ് ഇന്ത്യൻ നഗരങ്ങളിൽ നിന്നും ബെംഗളൂരു വിമാനത്താവളത്തിൽ എത്തുന്ന മലബാർ മേഖലയിലുള്ള യാത്രക്കാർക്ക് ഇനി മുതൽ ട്രെയിനുകളെയോ മറ്റ് കണക്റ്റിങ് ബസുകളെയോ ആശ്രയിക്കാതെ നേരിട്ട് നാട്ടിലെത്താം എന്നതാണ് ഇതിന്റെ പ്രധാന സവിശേഷത.

യാത്രക്കാരുടെ കംഫർട്ടിന് മുൻഗണന നൽകുന്ന മൾട്ടി-ആക്സിൽ എസി സെമി സ്ലീപ്പർ ബസുകളാണ് ഇതിനായി ഉപയോഗിക്കുന്നത്. വിമാന സർവീസുകളുടെ തത്സമയ വിവരങ്ങൾ യാത്രക്കാർക്ക് ലഭ്യമാക്കുന്ന ലൈവ് ഡിസ്‌പ്ലേ സ്ക്രീനുകൾ ഉൾപ്പെടെയുള്ള അത്യാധുനിക സംവിധാനങ്ങൾ ഈ ബസുകളിൽ ഒരുക്കിയിട്ടുണ്ട്. 41 സീറ്റുകളുള്ള ബസിൽ 1,550 രൂപയാണ് ടിക്കറ്റ് നിരക്ക്.

സമയക്രമം ഇങ്ങനെ:

ബെംഗളൂരുവിൽ നിന്ന്: ദിവസവും രാത്രി 10:45-ന് ബെംഗളൂരു വിമാനത്താവളത്തിൽ നിന്ന് (Terminal 1 & 2) പുറപ്പെടുന്ന ബസ്, പിറ്റേദിവസം രാവിലെ 07:15-ന് കോഴിക്കോട് എത്തും. ബെംഗളൂരു സിറ്റിയിലുള്ളവർക്കായി നയന്ദഹള്ളി മെട്രോ സ്റ്റേഷനിലും ഇതിന് സ്റ്റോപ്പ് അനുവദിച്ചിട്ടുണ്ട്.

കോഴിക്കോട് നിന്ന്: തിരിച്ച് രാത്രി 07:30-ന് കോഴിക്കോട് നിന്ന് പുറപ്പെട്ട് പിറ്റേദിവസം പുലർച്ചെ 05:15-ന് ബെംഗളൂരു വിമാനത്താവളത്തിൽ എത്തുന്ന രീതിയിലാണ് സമയം ക്രമീകരിച്ചിരിക്കുന്നത്.

മൈസൂരു, ഗോണികോപ്പ, മാനന്തവാടി, കൽപറ്റ, താമരശ്ശേരി വഴിയാണ് ഈ ബസ് കോഴിക്കോട്ടേക്ക് സർവീസ് നടത്തുന്നത്. വയനാട്, കോഴിക്കോട് ജില്ലകളിലുള്ള യാത്രക്കാർക്ക് ഈ സർവീസ് വലിയ തോതിൽ പ്രയോജനപ്പെടും. കർണാടക ആർടിസിയുടെ ഔദ്യോഗിക വെബ്‌സൈറ്റ് വഴിയും മൊബൈൽ ആപ്പ് വഴിയും യാത്രക്കാർക്ക് നിലവിൽ സീറ്റുകൾ ബുക്ക് ചെയ്യാവുന്നതാണ്.

Key Words : Karnataka RTC, Fly Bus