നേപ്പാളിൽ സോഷ്യൽ മീഡിയ നിരോധനം പിൻവലിച്ചു, കലാപം അവസാനിപ്പിക്കാൻ അഭ്യർത്ഥിച്ച് ഭരണകൂടം

Nepal lifts social media ban, calls for end to riots

കാഠ്മണ്ഡു: 19 പേരുടെ ജീവനെടുത്ത കലാപത്തെ തുടർന്ന് സോഷ്യൽ മീഡിയ പ്ലാറ്റ്‌ഫോമുകൾ നിരോധിച്ച നടപടി നേപ്പാൾ സർക്കാർ പിൻവലിച്ചു.

സർക്കാരിന്റെ നടപടിക്കെതിരെ യുവജനങ്ങളുടെ നേതൃത്വത്തിൽ വ്യാപക പ്രതിഷേധമാണ് ഉണ്ടായത്. 'ജെൻ സി' (Gen C) എന്നറിയപ്പെടുന്ന യുവതലമുറയുടെ നേതൃത്വത്തിൽ തലസ്ഥാനമായ കാഠ്മണ്ഡു അടക്കമുള്ള പ്രധാന നഗരങ്ങളിൽ നടന്ന പ്രക്ഷോഭങ്ങളിൽ 19 പേർ കൊല്ലപ്പെടുകയും നൂറുകണക്കിന് പേർക്ക് പരിക്കേൽക്കുകയും ചെയ്തു. 

പ്രക്ഷോഭം ശക്തമായതിനെ തുടർന്ന് ആഭ്യന്തരമന്ത്രി രമേശ് ലേഖക് രാജിവച്ചു. പ്രതിഷേധം കൂടുതൽ വ്യാപകമായതോടെ സർക്കാർ സോഷ്യൽ മീഡിയ നിരോധനം പിൻവലിക്കുകയായിരുന്നു.

ഫേസ്ബുക്ക്, യൂട്യൂബ്, വാട്ട്‌സ്ആപ്പ്, എക്‌സ് (മുമ്പ് ട്വിറ്റർ) ഉൾപ്പെടെ 26 സോഷ്യൽ മീഡിയാ പ്ലാറ്റ്‌ഫോമുകളാണ് നേപ്പാൾ സർക്കാർ നിരോധിച്ചത്. ദേശീയ സുരക്ഷാ പ്രശ്‌നങ്ങൾ ചൂണ്ടിക്കാട്ടിയാണ് നിരോധനം ഏർപ്പെടുത്തിയത്.

 എന്നാൽ, അഴിമതിയും ദുർഭരണവും മറച്ചുവെക്കാനുള്ള സർക്കാരിന്റെ നീക്കമാണിതെന്നാണ് പ്രതിഷേധക്കാർ ആരോപിച്ചത്.

കാഠ്മണ്ഡുവിലെ പാർലമെന്റ് മന്ദിരത്തിന് മുന്നിൽ തടിച്ചുകൂടിയ ആയിരക്കണക്കിന് പ്രതിഷേധക്കാർ പോലീസുമായി ഏറ്റുമുട്ടി. ലാത്തിച്ചാർജും കണ്ണീർവാതകവും പ്രയോഗിച്ചിട്ടും പിന്തിരിയാൻ തയ്യാറാകാത്ത പ്രക്ഷോഭകർക്ക് നേരെ പോലീസ് വെടിയുതിർക്കുകയായിരുന്നു. ഇതിലാണ് 19 പേർ കൊല്ലപ്പെട്ടത്. 

നിരവധി സ്കൂൾ വിദ്യാർത്ഥികളും പ്രതിഷേധത്തിൽ പങ്കെടുത്തു.

സോഷ്യൽ മീഡിയ നിരോധനം പിൻവലിക്കണമെന്നും അഴിമതി അവസാനിപ്പിക്കണമെന്നും ആവശ്യപ്പെട്ട് പ്രതിഷേധക്കാർ മുദ്രാവാക്യം വിളിച്ചു. പ്രതിഷേധം ശക്തമായതിനെ തുടർന്ന് കാഠ്മണ്ഡുവിലെ പലയിടങ്ങളിലും കർഫ്യൂ പ്രഖ്യാപിച്ചു. 

ഇതേസമയം, ആഭ്യന്തരമന്ത്രിയുടെ രാജിക്ക് ശേഷവും പ്രതിഷേധം തുടരുമെന്ന് യുവജനങ്ങൾ വ്യക്തമാക്കി. കൊല്ലപ്പെട്ടവർക്ക് നീതി ലഭിക്കണമെന്നും സർക്കാർ നടപടികൾക്ക് ഉത്തരവാദിത്വം ഏറ്റെടുക്കണമെന്നും അവർ ആവശ്യപ്പെട്ടു.

അടിയന്തര മന്ത്രിസഭാ യോഗത്തിന് ശേഷം വിവര വിനിമയ മന്ത്രി പൃഥ്വി സുബ്ബ ഗുരുങ് ആണ് സോഷ്യൽ മീഡിയ നിരോധനം പിൻവലിക്കുന്നതായി അറിയിച്ചത്. 

 പ്രക്ഷോഭകർ പ്രതിഷേധം അവസാനിപ്പിക്കണമെന്നും അദ്ദേഹം അഭ്യർത്ഥിച്ചു. എന്നാൽ സോഷ്യൽ മീഡിയ പ്ലാറ്റ്‌ഫോമുകൾക്ക് രാജ്യത്തെ നിയമങ്ങൾ പാലിക്കാൻ ആവശ്യപ്പെട്ടിട്ടുണ്ടെന്നും അല്ലാത്തപക്ഷം നടപടി തുടരുമെന്നും സർക്കാർ വൃത്തങ്ങൾ അറിയിച്ചു.