കഞ്ചാവിനു പിന്നാലെ വേടന് പിന്നേം കുരുക്ക്, മാലയിലുള്ളത് പുലിപ്പല്ല് തന്നെ, കേസെടുക്കുമെന്ന് വനംവകുപ്പ്

കൊച്ചി:  ഫ്‌ളാറ്റില്‍ നിന്നും കഞ്ചാവ് പിടികൂടിയതിനു പിന്നാലെ അറസ്റ്റിലായ പ്രശസ്ത യുവ റാപ്പര്‍ വേടന്റെ കൈവശം പുലിപ്പല്ലും. വേടന്റെ മാലയിലുള്ള...

കൊച്ചി:  ഫ്‌ളാറ്റില്‍ നിന്നും കഞ്ചാവ് പിടികൂടിയതിനു പിന്നാലെ അറസ്റ്റിലായ പ്രശസ്ത യുവ റാപ്പര്‍ വേടന്റെ കൈവശം പുലിപ്പല്ലും. വേടന്റെ മാലയിലുള്ളത് ഒറിജിനല്‍ പുലിപ്പല്ലാണെന്ന് സ്ഥിരീകരണം എത്തി. ഇതോടെ വേടനെതിരെ കേസെടുക്കുമെന്ന് വനംവകുപ്പ്. 

മാലയില്‍ ഉള്ള പുലിപ്പല്ല് തായ്ലന്‍ഡില്‍ നിന്ന് കൊണ്ടുവന്നതെന്ന് വേടന്‍ പറഞ്ഞുവെന്നാണ് റിപ്പോര്‍ട്ട്. പുലിപ്പല്ല് കൈവശം വെക്കുന്നത് ജാമ്യമില്ലാ വകുപ്പ് പ്രകാരമുള്ള കേസാണ്.

 ഇതിനിടെ, റാപ്പര്‍ വേടന്റെ (ഹിരണ്‍ദാസ് മുരളി) ഫ്ളാറ്റില്‍ നിന്ന് കഞ്ചാവ് പിടികൂടിയിരുന്നു. ഡാന്‍സാഫ് സംഘത്തിന്റെ പരിശോധനയില്‍ ഏഴ് ഗ്രാം കഞ്ചാവാണ് കണ്ടെത്തിയിരിക്കുന്നത്. പൊലീസ് സംഘം തൃപ്പൂണിത്തുറയിലെ ഫ്ളാറ്റില്‍ എത്തി പരിശോധന നടത്തുകയായിരുന്നു.

ഫ്ളാറ്റില്‍ ലഹരി ഉപയോഗിക്കുന്നുണ്ടെന്ന വിവരത്തെ തുടര്‍ന്നാണ് ഡാന്‍സാഫ് സംഘം എത്തിയതും പരിശോധന നടത്തിയതും. ഇവിടെ 9 പേരടങ്ങുന്ന സംഘം ഉണ്ടായിരുന്നതായും വിവരമുണ്ട്. റാപ്പര്‍ വേടന്റെ അറസ്റ്റ് രേഖപ്പെടുത്തി. വോയിസ് ഓഫ് വോയ്സ്ലെസ്സ് വേടന്റെ ശ്രദ്ധേയ ആല്‍ബമാണ്. മഞ്ഞുമ്മല്‍ ബോയ് സിനിമയിലെ 'വിയര്‍പ്പ് തുന്നിയിട്ട കുപ്പായം' എന്ന ഗാനത്തിന്റെ വരികള്‍ വേടന്റെ ആണ്.

വേടന്‍ ലഹരി ഉപയോഗിച്ചോ എന്നറിയാന്‍ മെഡിക്കല്‍ പരിശോധന നടത്തുമെന്നും പൊലീസ് അറിയിച്ചു. അതേ സമയം താന്‍ ലഹരി ഉപയോഗിച്ചെന്ന കുറ്റസമ്മതം വേടന്‍ നടത്തി. ഇതോടെ സര്‍ക്കാരിന്റെ നാലാം വാര്‍ഷിക ആഘോഷവുമായി ബന്ധപ്പെട്ട പരിപാടിയില്‍ നിന്നും വേടനെ ഒഴിവാക്കി.

കഴിഞ്ഞ ദിവസം പ്രമുഖ യുവ സംവിധായകരായ ഖാലിദ് റഹ്‌മാന്‍, അഷ്റഫ് ഹംസ എന്നിവര്‍ ഹൈബ്രിഡ് കഞ്ചാവുമായി കൊച്ചിയിലെ ഫ്ളാറ്റില്‍ നിന്നും പിടിയിലായിരുന്നു. മലയാള സിനിമയിലെ പ്രവര്‍ത്തകര്‍ക്കിടയിലെ ലഹരി ഉപയോഗത്തിനെതിരെ വ്യാപക പരാതികളും വിമര്‍ശനങ്ങളും ഉയരുന്നതിനിടെയാണ് വേടനും പിടിയിലാകുന്നത്. ലഹരിയുമായി ബന്ധപ്പെട്ട കേസില്‍ ശ്രീനാഥ് ഭാസിയും ഷൈന്‍ ടോം ചാക്കോയും ആലപ്പുഴ എക്സൈസ് ഓഫീസില്‍ ഇന്ന് ചോദ്യം ചെയ്യലിന് വിധേയരായിട്ടുമുണ്ട്.

Key Words: Vedan, Original Tiger's Tooth, Necklace