മുടി മുറിച്ചു, മാസ്‌ക്ധരിച്ചു, കയ്യില്‍ ധാരാളം പണം; താനൂരില്‍നിന്നു കാണാതായ പെണ്‍കുട്ടികള്‍ക്ക് വീട് മടുത്തെന്ന്

മുംബൈ : താനൂരില്‍നിന്നു കാണാതായ 2 പെണ്‍കുട്ടികളും മുംബൈയിലെത്തിയെന്ന് ഇന്നലെ പൊലീസ് കണ്ടെത്തിയിരുന്നു. പിന്നാലെ റെയില്‍വേ പൊലീസിന്റെ സഹായത്ത...

മുംബൈ : താനൂരില്‍നിന്നു കാണാതായ 2 പെണ്‍കുട്ടികളും മുംബൈയിലെത്തിയെന്ന് ഇന്നലെ പൊലീസ് കണ്ടെത്തിയിരുന്നു. പിന്നാലെ റെയില്‍വേ പൊലീസിന്റെ സഹായത്തോടെ കുട്ടികളെ കണ്ടെത്തി. മുംബൈ റെയില്‍വേ പൊലീസാണാണ് ഇപ്പോള്‍ ഇവരുടെ സംരക്ഷണം ഏറ്റെടുത്തിരിക്കുന്നത്. അതിനിടെ വീട്ടില്‍ ചില പ്രശ്‌നങ്ങള്‍ ഉണ്ടെന്നും കുടുംബത്തോടൊപ്പം തുടരാന്‍ കഴിയില്ലെന്നും പെണ്‍കുട്ടികളിലൊരാള്‍ ആണ്‍ സുഹൃത്തിനോട് പറഞ്ഞിരുന്നു. ഇതാണ് ഇവര്‍ നാടുവിടാന്‍ കാരണമെന്നാണ് ഇപ്പോഴുള്ള വിവരം. 

വിദ്യാര്‍ഥിനികളില്‍ ഒരാള്‍ ആവശ്യപ്പെട്ടതു കൊണ്ടാണ് യുവാവ് ഒപ്പം പോയതെന്നാണ് എടവണ്ണ സ്വദേശിയായ യുവാവിന്റെ കുടുംബാംഗങ്ങള്‍ പറയുന്നത്. ഇന്‍സ്റ്റഗ്രാം വഴിയാണ് യുവാവ് പെണ്‍കുട്ടിയെ പരിചയപ്പെട്ടത്. പിന്നീട്  വീട്ടില്‍ ചില പ്രശ്‌നങ്ങള്‍ ഉണ്ടെന്നും കുടുംബത്തോടൊപ്പം തുടരാന്‍ കഴിയില്ലെന്നും പെണ്‍കുട്ടി പറഞ്ഞു. വീട്ടില്‍ നിന്ന് ഇറങ്ങിപ്പോവുകയാണെന്ന് പറഞ്ഞപ്പോള്‍ യുവാവ് പിന്തിരിപ്പിക്കാന്‍ ശ്രമിച്ചു. സഹായിച്ചാലും ഇല്ലെങ്കിലും താന്‍ പോകുമെന്ന് പെണ്‍കുട്ടി പറഞ്ഞെന്നും യുവാവിന്റെ കുടുംബാംഗങ്ങള്‍ പറഞ്ഞു. കുട്ടിയുടെ ദുരവസ്ഥ കണ്ടാണ് ഇയാള്‍ കൂടെ പോയതെന്നും കുടുംബാംഗങ്ങള്‍ വ്യക്തമാക്കി.

മുംബൈയിലെ ലാസ്യ സലൂണില്‍ പെണ്‍കുട്ടികള്‍ മുടി ട്രിം ചെയ്യാന്‍ എത്തിയത് ഇന്നലെ ഉച്ചയ്ക്ക് രണ്ടു മണിയോടെ. മുഖം മറച്ചാണ് ഇരുവരും എത്തിയത്. ഹിന്ദിയോ ഇംഗ്ലിഷോ സംസാരിക്കാത്ത പെണ്‍കുട്ടികള്‍ക്ക് മലയാളം മാത്രമാണ് അറിയാമായിരുന്നത്.  മലയാളം അറിയാവുന്ന ജീവനക്കാരന്‍ പെണ്‍കുട്ടികള്‍ക്കൊപ്പം നിന്നു. മുഖത്തിന്റെ ലുക്ക് മാറ്റണമെന്നും വിദ്യാര്‍ഥിനികള്‍ ആവശ്യപ്പെട്ടു. നീളമുള്ള മുടി മുറിച്ചു. 10000 രൂപയ്ക്കാണ് രണ്ടുപേരുംകൂടി ട്രീറ്റ്മെന്റ് ചെയ്തത്. ഇതിനിടെ സമയമായെന്നും വേഗം പോകണമന്നും ഇവര്‍ പറഞ്ഞു. ഇത്രയും പണം മുടക്കുമ്പോള്‍ മുഴുവനായി ചെയ്യണമെന്നു ജീവനക്കാര്‍ വിശദീകരിച്ചു. ഇതിനിടെ പെണ്‍കുട്ടികളെ ആണ്‍സുഹൃത്ത് വിളിക്കുന്നുണ്ടായിരുന്നു. പേരും മൊബൈല്‍ നമ്പരും ചോദിച്ചപ്പോള്‍ ഫോണ്‍ കാണാതായെന്ന് പറഞ്ഞ് പേരു മാത്രമാണ് നല്‍കിയതെന്നും ജീവനക്കാര്‍ പൊലീസിനോട് വ്യക്തമാക്കി.

ഒരു സുഹൃത്തിന്റെ വിവാഹത്തില്‍ പങ്കെടുക്കാന്‍ വേണ്ടിയാണ് വന്നതെന്നും പന്‍വേലിലേക്ക് പോകുമെന്നും ജീവനക്കാരോട് പറഞ്ഞു. കൂടുതല്‍ കാര്യങ്ങള്‍ ചോദിച്ചപ്പോഴേക്കും പെണ്‍കുട്ടികള്‍ പരുങ്ങി. പൊലീസ് ബന്ധപ്പെട്ടപ്പോഴാണ് കേരളത്തില്‍നിന്നു കാണാതായ പെണ്‍കുട്ടികളാണ് സലൂണില്‍ എത്തിയതെന്ന് ജീവനക്കാര്‍ അറിയുന്നത്.

Key words: Tanur Missing Girls