കണ്ണൂര് : സിപിഐഎമ്മിന്റെ കണ്ണൂര് ജില്ലാ സെക്രട്ടറിയായി എം.വി ജയരാജന് വീണ്ടും തിരഞ്ഞെടുക്കപ്പെട്ടു. തളിപ്പറമ്പില് നടക്കുന്ന ജില്ലാ സമ്മേള...
കണ്ണൂര് : സിപിഐഎമ്മിന്റെ കണ്ണൂര് ജില്ലാ സെക്രട്ടറിയായി എം.വി ജയരാജന് വീണ്ടും തിരഞ്ഞെടുക്കപ്പെട്ടു. തളിപ്പറമ്പില് നടക്കുന്ന ജില്ലാ സമ്മേളനമാണ് എം.വി ജയരാജനെ വീണ്ടും സെക്രട്ടറിയായി തിരഞ്ഞെടുത്തത്. പുതിയ ജില്ലാ കമ്മിറ്റിയെയും സമ്മേളനം തിരഞ്ഞെടുത്തു. എസ്എഫ്ഐ സംസ്ഥാന പ്രസിഡന്റ് കെ അനുശ്രീ, ഡിവൈഎഫ്ഐ കണ്ണൂര് ജില്ലാ സെക്രട്ടറി സരിന് ശശി എന്നിവര് പുതിയതായി തിരഞ്ഞെടുത്ത ജില്ലാ കമ്മിറ്റിയില് ഇടംനേടി. എം വി നികേഷ് കുമാറും സിപിഐഎം ജില്ലാ കമ്മിറ്റിയിലേയ്ക്ക് തിരഞ്ഞെടുക്കപ്പെട്ടു.
10 പുതുമുഖങ്ങളാണ് പുതിയതായി ജില്ലാ കമ്മിറ്റിയിലേയ്ക്ക് തിരഞ്ഞെടുക്കപ്പെട്ടത്. എം വി നികേഷ് കുമാര്, കെ അനുശ്രീ, പി ഗോവിന്ദന്, കെപിവി പ്രീത, എന് അനില് കുമാര്, സി എം കൃഷ്ണന്, മുഹമ്മദ് അഫ്സല്, സരിന് ശശി, കെ ജനാര്ദ്ദനന്, സി കെ രമേശന് എന്നിവരാണ് ജില്ലാ കമ്മിറ്റിയിലെ പുതുമുഖങ്ങള്. ജില്ലാ സെക്രട്ടറിയായിരുന്ന പി ജയരാജന് 2019-ലെ ലോക്സഭാ തിരഞ്ഞെടുപ്പില് മത്സരിച്ചതിനെ തുടര്ന്നാണ് എം വി ജയരാജന് സിപിഐഎം കണ്ണൂര് ജില്ലാ സെക്രട്ടറിയായി നിയോഗിക്കപ്പെടുന്നത്. പിന്നീട് 2021-ല് ജില്ലാ സമ്മേളനത്തില് ജയരാജന് വീണ്ടും സെക്രട്ടറിയായി തിരഞ്ഞെടുക്കപ്പെട്ടു.
2024-ലെ പാര്ലമെന്റ് തിരഞ്ഞെടുപ്പില് കണ്ണൂരില് നിന്നും മത്സരിച്ചെങ്കിലും കെപിസിസി അധ്യക്ഷന് കെ സുധാകരനോട് എം വി ജയരാജന് പരാജയപ്പെട്ടിരുന്നു. സിപിഐഎം സംസ്ഥാന കമ്മിറ്റി അംഗമായ എം വി ജയരാജന് സിഐടിയുവിന്റെ കേന്ദ്രപ്രവര്ത്തക സമിതി അംഗവുമാണ്. വൈകുന്നേരം അഞ്ച് മണിക്ക് റെഡ് വളണ്ടിയര് മാര്ച്ചും പിന്നാലെ പൊതുസമ്മേളനവും നടക്കും. മുഖ്യമന്ത്രി പിണറായി വിജയന് പൊതുസമ്മേളനം ഉദ്ഘാടനം ചെയ്യും.
Key Words: MV Jayarajan, CPIM, Kannur District Secretary
COMMENTS