പരാതി രഹിതമായ തീര്‍ത്ഥാടനകാലം മുന്നാരുക്കങ്ങളുടേയും കൂട്ടായ പ്രവര്‍ത്തനങ്ങളുടെയും ഫലം: മന്ത്രി വി എന്‍ വാസവന്‍

പത്തനംതിട്ട: കാലേകൂട്ടി നടത്തിയ തയാറെടുപ്പുകളുടെയും കൂട്ടായ പ്രവര്‍ത്തനങ്ങളുടെയും ഫലമാണ് പരാതി രഹിതമായ മണ്ഡല തീര്‍ത്ഥാടനകാലമെന്നു ദേവസ്വം വക...

പത്തനംതിട്ട: കാലേകൂട്ടി നടത്തിയ തയാറെടുപ്പുകളുടെയും കൂട്ടായ പ്രവര്‍ത്തനങ്ങളുടെയും ഫലമാണ് പരാതി രഹിതമായ മണ്ഡല തീര്‍ത്ഥാടനകാലമെന്നു ദേവസ്വം വകുപ്പുമന്ത്രി വി എന്‍ വാസവന്‍. മണ്ഡലപൂജ ക്രമീകരണങ്ങളും മകരവിളക്ക് ഒരുക്കങ്ങളും വിലയിരുത്താന്‍ ശബരിമല സന്നിധാനത്തു സന്ദര്‍ശനത്തിനെത്തിയതായിരുന്നു മന്ത്രി. ഒരു ലക്ഷത്തിലേറെ തീര്‍ഥാടകര്‍ വന്ന ദിവസമുണ്ടായിട്ടും ഒരാള്‍ പോലും ദര്‍ശനം കിട്ടാതെ മടങ്ങേണ്ടി വന്ന സാഹചര്യമുണ്ടായിട്ടില്ല. 41 ദിവസം പൂര്‍ത്തിയാകുമ്പോള്‍ വന്ന എല്ലാ അയ്യപ്പഭക്തന്മാര്‍ക്കും ദര്‍ശനം ഉറപ്പാക്കി. അവര്‍ സംതൃപ്തിയോടെ മടങ്ങുന്ന കാഴ്ചയാണു കണ്ടത്. അത്തരത്തിലായിരുന്നു ആസൂത്രണത്തിലെ മികവ്. 

പതിനെട്ടാം പടിയില്‍ ഒരുമിനിട്ടില്‍ 85-90 പേര്‍ കയറുന്ന സാഹചര്യം സൃഷ്ടിക്കാനായത് ദര്‍ശനം സുഗമാക്കാന്‍ തുണച്ചു. സംസ്ഥാന സര്‍ക്കാരും ദേവസ്വം ബോര്‍ഡും സന്നദ്ധസംഘടകളെക്കൂടി ഉള്‍പ്പെടുത്തി കാലേകൂട്ടി ചര്‍ച്ചകള്‍ നടത്തിയിരുന്നു. മുന്‍വര്‍ഷത്തെ അപേക്ഷിച്ച് അഞ്ചു ലക്ഷത്തോളം ഭക്തരാണ് ഈ 41 ദിവസത്തെ കാലയളവില്‍ കൂടുതലായി എത്തിയത്.  വരുമാനം മുന്‍വര്‍ഷത്തെ അപേക്ഷിച്ച് 28 കോടി രൂപയോളം കൂടുതലാണെന്ന് താല്‍ക്കാലികമായി ലഭ്യമായ കണക്ക്. ദര്‍ശനം കിട്ടാതെ വന്നതായി ആരും പരാതിപ്പെട്ടിട്ടില്ല. സുഗമമായ ദര്‍ശനം ഉറപ്പാക്കാനായി എന്നു വന്നവര്‍ തന്നെ പറയുന്നു. 

മലകയറിവന്ന എല്ലാവര്‍ക്കും സൗജന്യഭക്ഷണം ഉറപ്പാക്കാനായി. അപ്പവും അരവണയും എല്ലാവര്‍ക്കും ലഭിക്കുമെന്ന് ഉറപ്പാക്കി. കാലേകൂട്ടി നടത്തിയ തയാറെടുപ്പുകള്‍ എല്ലാ അര്‍ഥത്തിലും ഫലം കണ്ടു. മകരവിളക്ക് ഒരുക്കങ്ങള്‍ സംബന്ധിച്ചു ഡിസംബര്‍ 28ന് നടക്കുന്ന യോഗത്തില്‍ ചര്‍ച്ച ചെയ്യും. ഇന്ന് നടക്കേണ്ട യോഗം എം ടിയുടെ വിയോഗത്തെത്തുടര്‍ന്നാണ് മാറ്റിവച്ചത്.  ഇരുപത്തിയെട്ടിന്റെ യോഗത്തില്‍ മകരവിളക്കുമായി ബന്ധപ്പെട്ട എല്ലാ മുന്നൊരുക്കങ്ങളും ചര്‍ച്ച ചെയ്തു തീരുമാനമെടുക്കുമെന്നു മന്ത്രി വി എന്‍ വാസവന്‍ പറഞ്ഞു.

Key Words: Complaint Free Pilgrimage, Sabarimala, Minister VN Vasavan