ന്യൂഡല്ഹി: ഇന്നൊരു ദിവസത്തെ കാത്തിരിപ്പ് മാത്രം മതി രാജ്യം ഇനി അടുത്ത അഞ്ചുവര്ഷത്തേക്ക് ആരുടെ കയ്യിലെന്നറിയാന്. എക്സിറ്റ് പോള് ഫലം എന്...
ന്യൂഡല്ഹി: ഇന്നൊരു ദിവസത്തെ കാത്തിരിപ്പ് മാത്രം മതി രാജ്യം ഇനി അടുത്ത അഞ്ചുവര്ഷത്തേക്ക് ആരുടെ കയ്യിലെന്നറിയാന്. എക്സിറ്റ് പോള് ഫലം എന്ഡിഎക്കൊപ്പമെന്നത് പ്രതിപക്ഷ സഖ്യമായ ഇന്ത്യയുടെ ഉറക്കം കെടുത്തിയിട്ടുണ്ട്. എന്ഡിഎയ്ക്ക്- 365, ഇന്ത്യ സഖ്യം -146, മറ്റുള്ളവര് 32. എന്നിങ്ങനെയാണ് എക്സിറ്റ് പോള് ഫലത്തിന്റെ ദേശീയ ശരാശരി. 295 സീറ്റുകളിലധികം നേടി വിജയിക്കുമെന്ന് ആവര്ത്തിക്കുന്നതിനിടെ വന്ന പ്രവചനം തെരഞ്ഞെടുപ്പ് ഫലം അട്ടിമറിക്കാനുള്ള നീക്കമാണെന്നാണ് ഇന്ത്യ സഖ്യത്തിന്റെ ആരോപണം.
പ്രതിപക്ഷത്തിന്റെ ഈ ആരോപണം നിലനില്ക്കേ, വോട്ടെണ്ണലിന് ഒരു ദിവസം മാത്രം ശേഷിക്കെ നിര്ണ്ണായക വാര്ത്താ സമ്മേളനം വിളിച്ച് തെരഞ്ഞെടുപ്പ് കമ്മീഷനും എത്തിയിട്ടുണ്ട്. ഇന്ന് ഡല്ഹിയില് മുഖ്യ തെരഞ്ഞെടുപ്പ് കമ്മീഷണറും കമ്മീഷണര്മാരും മാധ്യമങ്ങളെ കാണും. വോട്ടെണ്ണലിന് ഇന്ത്യ സഖ്യം ചില നിര്ദ്ദേശങ്ങള് മുന്നോട്ടു വച്ചിരിക്കെയാണ് വാര്ത്താ സമ്മേളനമെന്നുള്ളതാണ് ശ്രദ്ധേയം.
വോട്ടെണ്ണല് സുതാര്യമാക്കണമെന്നാവശ്യപ്പെട്ട് ഇന്ത്യ സഖ്യ നേതാക്കള് ഇന്നലെ തെരഞ്ഞെടുപ്പ് കമ്മീഷനെ കണ്ടിരുന്നു. തെരഞ്ഞെടുപ്പ് ഫലത്തെയും തെരഞ്ഞെടുപ്പ് കമ്മീഷനെയും അപമാനിക്കാന് ഇന്ത്യ സഖ്യം ശ്രമിക്കുന്നുവെന്നാരോപിച്ച് ബിജെപി നേതാക്കളും കമ്മീഷനിലെത്തി. ഈ പശ്ചാത്തലത്തിലാണ് നേതാക്കള് തെരഞ്ഞെടുപ്പ് കമ്മീഷനെ കണ്ടത്.
പോസ്റ്റല് ബാലറ്റുകള് ആദ്യം എണ്ണി ഫലം പ്രഖ്യാപിക്കണം, അതിന് ശേഷം മാത്രമേ ഇലക്ട്രോണിക് വോട്ടിംഗ് മെഷീനുകളിലെ വോട്ടുകള് എണ്ണാവൂയെന്ന് നേതാക്കള് കമ്മീഷനോടാവശ്യപ്പെട്ടു. ഫോം 17 സിയില് ബൂത്ത് തിരിച്ചുള്ള വോട്ടിംഗ് കണക്കുകള് ലഭ്യമാക്കണമെന്നും ആവശ്യപ്പെട്ടു.
ഫലം അട്ടിമറിക്കാന് ജില്ലാ മജിസ്ട്രേറ്റുമാരെ നേരിട്ട് വിളിച്ച് അമിത്ഷാ ഭീഷണിപ്പെടുത്തുകയാണെന്ന് ജയറാം രമേശ് ആരോപിച്ചിരുന്നു. ഈ സാഹചര്യങ്ങളിലാണ് ഇന്ന് തെരഞ്ഞെടുപ്പ് കമ്മീഷന് വാര്ത്താ സമ്മേളനം വിളിച്ചിരിക്കുന്നത്.
Key Words: NDA, INDIA, Counting Day, Election Commission
COMMENTS