കൊച്ചി: അങ്കമാലി താലൂക്ക് ആശുപത്രിയിലെ അത്യാഹിത വിഭാഗത്തില് രോഗികളെയടക്കം വലച്ച് സിനിമാ ഷൂട്ടിങ്. വ്യാഴാഴ്ച രാത്രിയാണ് രോഗികളെ ബുദ്ധിമുട്ട...
കൊച്ചി: അങ്കമാലി താലൂക്ക് ആശുപത്രിയിലെ അത്യാഹിത വിഭാഗത്തില് രോഗികളെയടക്കം വലച്ച് സിനിമാ ഷൂട്ടിങ്. വ്യാഴാഴ്ച രാത്രിയാണ് രോഗികളെ ബുദ്ധിമുട്ടിലാക്കി സിനിമാ ചിത്രീകരണം നടത്തിയത്. സംഭവത്തില് മനുഷ്യാവകാശ കമ്മിഷന് സ്വമേധയാ കേസെടുത്തു.
ഫഹദ് ഫാസില് നിര്മിക്കുന്ന 'പൈങ്കിളി'എന്ന സിനിമയാണ് രാത്രി ഒന്പതു മണിയോടെ ചിത്രീകരണം തുടങ്ങിയത്. സ്വകാര്യ ആശുപത്രിയുടെ സെറ്റ് എന്ന നിലയിലാണ് സര്ക്കാര് ആശുപത്രി സിനിമയില് ചിത്രീകരിച്ചത്. 2 ദിവസമായിരുന്നു ചിത്രീകരണം. ചിത്രീകരണ സമയത്തു നിശബ്ദത പാലിക്കാന് അണിയറ പ്രവര്ത്തകര് രോഗികളോടും കൂട്ടിരിപ്പുകാരോടും നിര്ദേശിക്കുന്നുണ്ടായിരുന്നു.
സര്ക്കാര് ആശുപത്രിയിലെ അത്യാഹിത വിഭാഗത്തില് സിനിമ ചിത്രീകരിക്കാന് അനുമതി നല്കിയവര് ഏഴ് ദിവസത്തിനകം വിശദീകരണം സമര്പ്പിക്കണമെന്ന് കമ്മിഷന് അംഗം വി.കെ. ബീനാകുമാരി ആവശ്യപ്പെട്ടു. എറണാകുളം ജില്ലാ മെഡിക്കല് ഓഫിസര്, അങ്കമാലി താലൂക്ക് ആശുപത്രി സൂപ്രണ്ട് എന്നിവര്ക്കാണു നിര്ദേശം നല്കിയത്.
അത്യാഹിത വിഭാഗത്തിലെ ലൈറ്റുകള് മറച്ചും നിയന്ത്രണങ്ങള് ഏര്പ്പെടുത്തിയുമായിരുന്നു ചിത്രീകരണം. അഭിനേതാക്കള് ഉള്പ്പെടെ അന്പതോളം പേര് അത്യാഹിത വിഭാഗത്തില് ഉണ്ടായിരുന്നു. ഡോക്ടര്മാര് ചികിത്സ തുടരുന്നതിനിടയിലും സിനിമാ ചിത്രീകരണം നടന്നുവെന്നാണു വിവരം. പ്രധാന കവാടത്തിലൂടെ ആരെയും കടത്തിവിട്ടുമില്ല.
പരിമിതമായ സ്ഥലമാണ് അത്യാഹിത വിഭാഗത്തിലുള്ളത്. അത്യാസന്ന നിലയിലുള്ള രോഗിയുമായി എത്തിയയാള്ക്ക് അത്യാഹിത വിഭാഗത്തിലേക്കു പ്രവേശിക്കാന് പോലുമായില്ലെന്നും പരാതിയുണ്ട്.
Key Words: Film Shooting, Angamaly Taluk Hospital, Case, Fahad Fasil
COMMENTS