Film Director Shaji Kailas has apologized for making remarks that hurt the parents of differently-abled children in the movie Kaduva
തിരുവനന്തപുരം: കഴിഞ്ഞ ദിവസം റിലീസായ കടുവ എന്ന ചിത്രത്തില് ഭിന്നശേഷിക്കാരായ കുട്ടികളുടെ മാതാപിതാക്കളെ വേദനിപ്പിക്കുന്ന തരത്തില് പരാമര്ശം വന്നതില് സംവിധായകന് ഷാജി കൈലാസ് മാപ്പു ചോദിച്ചു.
തെറ്റ് അംഗീകരിക്കുന്നുവെന്നും തിരുത്തുമെന്നും ചിത്രത്തിലെ നായകന് പൃഥ്വിരാജും പറഞ്ഞു. ഷാജി കൈലാസിന്റെ പോസ്റ്റ് പൃഥ്വി ഷെയര് ചെയ്തിട്ടുമുണ്ട്.
അങ്ങനെയൊരു സംഭാഷണശകലം കൈപ്പിഴയാണ്. മനുഷ്യസഹജമായ തെറ്റായിക്കണ്ട് പൊറുക്കണമെന്ന് ഷാജി കൈലാസ് ഫേസ്ബുക്ക് പോസ്റ്റില് പറഞ്ഞു.
സംഭാഷണം എഴുതുമ്പോള് തിരക്കഥാകൃത്ത് ജിനുവോ അതു പറയുമ്പോള് നായകന് പൃഥ്വിരാജോ ആ രംഗം ഒരുക്കുമ്പോള് താനോ അതിന്റെ മറ്റു വശങ്ങളെക്കുറിച്ചു ചിന്തിച്ചില്ല.
വില്ലന്റെ ക്രൂരത എത്രത്തോളമുണ്ടെന്ന് അയാളെയും കാണികളെയും ബോധ്യപ്പെടുക മാത്രമായിരുന്നു ഉദ്ദേശ്യം്.
നമ്മള് ചെയ്യുന്നതിന്റെ ഫലം അനന്തര തലമുറയാണ് അനുഭവിക്കുകയെന്ന വാക്കുകള് കാലങ്ങളായി നാം കേള്ക്കുന്നു. ശരിതെറ്റുകളെക്കുറിച്ചോ അതിന്റെ വൈകാരിക പ്രത്യാഘാതങ്ങളെക്കുറിച്ചോ ചിന്തിക്കാതെ തീര്ത്തും സാധാരണനായ മനുഷ്യന് ഒരുനിമിഷത്തെ വികാരവിക്ഷോഭത്തില് പറഞ്ഞ വാക്കുകള് മാത്രമായി അതിനെ കാണണമെന്ന് അപേക്ഷിക്കുന്നുവെന്നും ഷാജി കൈലാസ് പറഞ്ഞു.
മാതാപിതാക്കളുടെ ചെയ്തികളുടെ ഫലമാണ് ഭിന്നശേഷിക്കാരായ കുട്ടികള് അനുഭവിക്കുന്നതെന്ന് ഇതിന് ഒരിക്കലും അര്ഥമില്ല. വിദൂരചിന്തകളില് പോലും അങ്ങനെയൊന്നില്ല.
മക്കളെ സ്നേഹിക്കുന്ന അച്ഛനാണ് ഞാനും. അവര് ചെറുതായൊന്ന് വീണാല് പോലും എനിക്ക് വേദനിക്കാറുണ്ട്. അതിനാല്, ഭിന്നശേഷിക്കാരായ കുട്ടികളുടെ മാതാപിതാക്കളുടെ മാനസികാവസ്ഥ മറ്റാരും പറയാതെ എനിക്ക് മനസ്സിലാക്കാനാകും.
കടുവയിലെ വാക്കുകള് മുറിവേല്പിച്ചുവെന്നു കാട്ടി ഭിന്നശേഷി കമ്മിഷന് പരാതി കിട്ടിയിരുന്നു. സിനിമ ടീമിനെതിരേ ഭിന്നശേഷി കമ്മിഷണര് കേസെടുത്തിരുന്നു. സിനിമയില് നിന്ന് ഈ രംഗങ്ങള് നീക്കണമെന്നും കമ്മിഷന് നിര്ദ്ദേശിച്ചു.
COMMENTS