Malayalee hockey player Sreejesh landed at Nedumbassery airport at 5 pm. Hundreds of fans were waiting to receive him
കൊച്ചി: ടോക്കിയോ ഒളിമ്പിക്സില് ഇന്ത്യയുടെ ഹോക്കി വെങ്കല മെഡലിനുള്ള നേട്ടത്തില് ചുക്കാന് പിടിച്ച മലയാളി താരം പി.ആര്. ശ്രീജേഷിന് കൊച്ചിയില് വന് വരവേല്പ്.
വൈകുന്നേരം അഞ്ചു മണിക്കാണ് നെടുമ്പാശേരി വിമാനത്താവളത്തില് ശ്രീജേഷ് വന്നിറങ്ങിയത്. നൂറുകണക്കിന് ആരാധകരാണ് അദ്ദേഹത്തെ സ്വീകരിക്കാന് കാത്തുനിന്നത്.
കായികമന്ത്രി വി. അബ്ദുറഹ്മാനും സ്പോര്ട്സ് കൗണ്സില്, ഒളിമ്പിക് അസോസിയേഷന്, ഹോക്കി അസോസിയേഷന് ഭാരവാഹികളും വിമാനത്താവളത്തില് എത്തിയിരുന്നു. ശ്രീജേഷിന്റെ കുടുംബാംഗങ്ങളും വിമാനത്താവളത്തിലെത്തിയിരുന്നു.
സര്ക്കാര് ഒരുക്കിയ പ്രത്യേകവാഹനത്തിലാണ് ശ്രീജേഷ് വിമാനത്താവളത്തില് നിന്നു പുറത്തേക്ക് വന്നത്. ശ്രീജേഷിന്റെ ജന്മനാടായ കിഴക്കമ്പലം എരുമേലി വരെ വിവിധയിടങ്ങളില് സ്വീകരണമൊരുക്കിയിരുന്നു.
ജര്മനിയെ 5-4ന് തോല്പ്പിച്ചാണ് ഇന്ത്യ വെങ്കല മെഡല് നേടുമ്പോള് അതില് ഏറ്റവും നിര്ണായകമായത് ഗോളിയായിരുന്ന ശ്രീജേഷ് ഉയര്ത്തിയ പ്രതിരോധക്കോട്ടയായിരുന്നു. 1980ന് ശേഷം ആദ്യമായാണ് ഇന്ത്യ ഹോക്കിയില് ഒളിമ്പിക് മെഡല് നേടുന്നത്.
COMMENTS