തിരുവനന്തപുരം: മുഖ്യമന്ത്രി വിദേശത്തു പോയിരിക്കുന്നത് വൈദ്യപരിശോധനയ്ക്കാണെന്നും അതു പൂര്‍ത്തിയാക്കി വരുന്നതു വരെ ഒരു ഭരണസ്തംഭനവും ഉണ്ടാ...

തിരുവനന്തപുരം: മുഖ്യമന്ത്രി വിദേശത്തു പോയിരിക്കുന്നത് വൈദ്യപരിശോധനയ്ക്കാണെന്നും അതു പൂര്‍ത്തിയാക്കി വരുന്നതു വരെ ഒരു ഭരണസ്തംഭനവും ഉണ്ടാകില്ലെന്നും വ്യവസായ മന്ത്രി ഇപി ജയരാജന്‍ പറഞ്ഞു.

മുഖ്യമന്ത്രി എന്നു തിരിച്ചുവരുമെന്നു പരിശോധനകള്‍ കഴിയുന്ന മുറയ്ക്കു മാത്രമേ പറയാനാവൂ. മുഖ്യമന്ത്രി സ്ഥലത്തില്ലെങ്കിലും ദുരിതാശ്വാസ പ്രവര്‍ത്തനങ്ങള്‍ ഇന്നലെ വരെ എങ്ങനെ നടന്നോ അതുപോലെ തുടരുമെന്ന് ജയരാജന്‍ വ്യക്തമാക്കി.

ഓരോ മന്ത്രിമാരെ എല്ലാ ജില്ലകളിലും പ്രവര്‍ത്തനങ്ങള്‍ക്ക് നേതൃത്വം കൊടുക്കാനും സഹായം ലഭ്യമാക്കാനും നിയമിച്ചിട്ടുണ്ട്. എല്ലാ ജില്ലയികളിലും അവര്‍ ദുരിതാശ്വാസപ്രവര്‍ത്തനങ്ങളില്‍ സജീവമായി പ്രവര്‍ത്തിക്കുന്നു.

പ്രളയം നിമിത്തം കാര്‍ഷിക മേഖലയിലും കച്ചവടക്കാര്‍ക്കും വന്‍ നഷ്ടമുണ്ടായി. അതു നികത്താന്‍ കേരളത്തിനകത്തും പുറത്തുമുള്ള എല്ലാ സഹായവും നേടണം.

ലോകമെമ്പാടുമുള്ള മലയാളികളില്‍ നിന്നു കേരളത്തിനായി സഹായം കിട്ടുന്നതിന് വിദേശത്തേക്ക് മന്ത്രിമാര്‍ പോകുന്നതാണ് ഗുണകരമെന്നാണ് എന്നാണ് സര്‍ക്കാര്‍ കരുതുന്നത്. അതിനാലാണ് മന്ത്രിമാരെ വിദേശത്തേയ്ക്ക് അയയ്ക്കുന്നത്.

നിര്‍ണായക തീരുമാനങ്ങള്‍ വേണ്ടിവന്നാല്‍ ഒരു തടസ്സവും ഉണ്ടാകില്ല. മന്ത്രിസഭാ യോഗം മുറയ്ക്കു നടക്കും. ആരാണ് അദ്ധ്യക്ഷത വഹിക്കുകയെന്നു മന്ത്രിസഭാ യോഗം കഴിയുമ്പോള്‍ അറിയാം. കൂട്ടായ പ്രവര്‍ത്തനത്തിലാവും സര്‍ക്കാര്‍ മുന്നോട്ടു പോവുകയെന്നും അദ്ദേഹം പറഞ്ഞു.