There is still a frenzy of discussion in Delhi about how the Modi 3.0 team will fare. BJP sources had earlier taken a stand that no matter how much
അഭിനന്ദ്
ന്യൂഡല്‍ഹി: മോഡി 3.0 ടീം എങ്ങനെയെന്നതിനെക്കുറിച്ച് ഇപ്പോഴും ഡല്‍ഹിയില്‍ തിരക്കിട്ട ചര്‍ച്ചകള്‍ നടക്കുകയാണ്. സഖ്യകക്ഷികളുടെ സമ്മര്‍ദ്ദം എത്രതന്നെയായാലും ആഭ്യന്തരം, പ്രതിരോധം, ധനകാര്യം, വിദേശകാര്യം എന്നീ നിര്‍ണായക വകുപ്പുകള്‍ വിട്ടുനല്‍കില്ലെന്ന് ബിജെപി വൃത്തങ്ങള്‍ നേരത്തെ നിലപാടെടുത്തിരുന്നു.
കൂടാതെ, മോഡിയുടെ ആദ്യ രണ്ടു സര്‍ക്കാരുകളിലും വയിലെ റോഡ് ശൃംഖലയുടെ വിപുലീകരണം വളരെയധികം പ്രശംസ നേടി. അതിനു പിന്നിലുള്ള കരുത്തായ നിതിന്‍ ഗഡ്കരിയെ വകുപ്പില്‍ നിന്നു മാറ്റാന്‍ സാദ്ധ്യതയില്ല.
മൂന്നാം നരേന്ദ്ര മോഡി സര്‍ക്കാരില്‍ എന്‍ ചന്ദ്രബാബു നായിഡുവിന്റെ ടിഡിപിക്കും നിതീഷ് കുമാറിന്റെ ജെഡിയുവിനും ഒരു കാബിനറ്റ് ബെര്‍ത്തും ഒരു സഹമന്ത്രി സ്ഥാനവുമാണ് ഇതുവരെ ഉറപ്പായത്. മറ്റു സീറ്റുകള്‍ക്കുവേണ്ടി വിലപേശല്‍ നടക്കുകയാണ്.
ഇന്നലെ പ്രധാനമന്ത്രിയുടെ വസതിയില്‍ 11 മണിക്കൂര്‍ നീണ്ട മാരത്തണ്‍ യോഗത്തിന് ശേഷമാണ് പുതിയ മന്ത്രിസഭയെക്കുറിച്ചുള്ള തീരുമാനങ്ങള്‍ കൈക്കൊണ്ടത്. അമിത് ഷാ, ബിജെപി അധ്യക്ഷന്‍ ജെപി നദ്ദ, പാര്‍ട്ടി ദേശീയ ജനറല്‍ സെക്രട്ടറി (സംഘടന) ബിഎല്‍ സന്തോഷ് എന്നിവര്‍ യോഗത്തില്‍ പങ്കെടുത്തു.
ഇന്ന് വൈകിട്ട് 7.15ന് പ്രധാനമന്ത്രി മോഡി സത്യപ്രതിജ്ഞ ചെയ്ത് അധികാരമേല്‍ക്കും. അതിന് മുന്നോടിയായി, മന്ത്രിമാരാകാന്‍ പോകുന്നവര്‍ക്കായി അദ്ദേഹം തന്റെ വസതിയില്‍ ചായ സത്കാരം നടത്തുന്നുണ്ട്.
സ്ഥാനമൊഴിയുന്ന ആഭ്യന്തര മന്ത്രി അമിത് ഷാ, പ്രതിരോധ മന്ത്രി രാജ്നാഥ് സിംഗ്, റോഡ്സ് ആന്‍ഡ് ഹൈവേ മന്ത്രി നിതിന്‍ ഗഡ്കരി എന്നിവര്‍ തങ്ങളുടെ വകുപ്പുകള്‍ നിലനിര്‍ത്താന്‍ സാധ്യതയുണ്ടെന്നാണ് അറിയുന്നത്. രാജ്യസഭാ എംപിമാരായ നിര്‍മല സീതാരാമനും ഡോ എസ് ജയശങ്കറും യഥാക്രമം ധനകാര്യവും വിദേശകാര്യവും വകുപ്പുകളില്‍ തുടരുമെന്നാണ് സൂചന.
മറ്റ് സഖ്യകക്ഷികളില്‍, എല്‍ജെപി (രാം വിലാസ്) ജെഡിഎസിലെ ചിരാഗ് പാസ്വാന്‍, എച്ച്ഡി കുമാരസ്വാമി, അപ്നാ ദളിന്റെ അനുപ്രിയാ പട്ടേല്‍ (സോണലാല്‍), ആര്‍എല്‍ഡിയുടെ ജയന്ത് ചൗധരി, ഹിന്ദുസ്ഥാനി അവാം മോര്‍ച്ചയുടെ ജിതന്‍ റാം മാത്ധി എന്നിവര്‍ക്ക് മന്ത്രിസ്ഥാനം ലഭിച്ചേക്കുമെന്നറിയുന്നു.
ഏകനാഥ് ഷിന്‍ഡെയുടെ ശിവസേനയെ പ്രതിനിധാനം ചെയ്ത് ബുല്‍ധാന എംപി പ്രതാപ് റാവു ജാദവ് മന്ത്രിയായേക്കും. രാജ്യസഭാ എംപിയും ബിജെപിയുടെ ദീര്‍ഘകാല സഖ്യകക്ഷിയായ റിപ്പബ്ലികന്‍ പാര്‍ട്ടി ഒഫ് ഇന്ത്യയുടെ (എ) തലവനുമായ രാംദാസ് അത്താവലെയും മന്ത്രിയാകാന്‍ ഒരുങ്ങുന്നു.
പശ്ചിമ ഡല്‍ഹി എംപി കമല്‍ജീത് സെഹ്രാവത്ത്, മുന്‍ ഹരിയാന മുഖ്യമന്ത്രി മനോഹര്‍ ലാല്‍ ഖട്ടര്‍, മധ്യപ്രദേശ് നേതാക്കളായ ശിവരാജ് സിംഗ് ചൗഹാന്‍, ജ്യോതിരാദിത്യ സിന്ധ്യ എന്നിവര്‍ക്കും മന്ത്രിസ്ഥാനം ലഭിച്ചേക്കും.
വടക്കുകിഴക്കന്‍ സംസ്ഥാനങ്ങളില്‍ നിന്നുള്ള ബിജെപിയുടെ നേതാക്കളായ സര്‍ബാനന്ദ സോനോവാളും കിരണ്‍ റിജിജുവും മന്ത്രിമാരായി തിരിച്ചെത്തിയേക്കും. ജി കിഷന്‍ റെഡ്ഡി, ശോഭ കരന്ദലജെ, ബി എല്‍ വര്‍മ, ബന്ദി സഞ്ജയ് കുമാര്‍, നിത്യാനന്ദ് റായ് എന്നിവരുടെ പേരുകളും പരിഗണനയിലുണ്ട്.
കേവലഭൂരിപക്ഷവുമായി രണ്ട് തവണ ഭരിച്ച ബി.ജെ.പിക്ക് ഇത്തവണ 240 സീറ്റുകളേ നേടാന്‍ കഴിഞ്ഞുള്ളൂ. ഇതോടെ, ചന്ദ്രബാബു നായിഡുവും നിതീഷ് കുമാറും കിംഗ് മേക്കര്‍മാരുടെ സ്ഥാനത്തേക്ക് എത്തി.
16 സീറ്റ് നേടിയ ടിഡിപിയും 12 സീറ്റ് നേടിയ ജെഡിയുവും സുപ്രധാന വകുപ്പുകള്‍ ആവശ്യപ്പെട്ടതായാണ് വിവരം.
ജെഡിയുവില്‍ നിന്ന് പാര്‍ട്ടി മുന്‍ അധ്യക്ഷന്‍ രാജീവ് രഞ്ജന്‍ സിംഗ്, രാജ്യസഭാ എംപിയും മുന്‍ ബിഹാര്‍ മുഖ്യമന്ത്രി കര്‍പ്പൂരി താക്കൂറിന്റെ മകന്‍ രാംനാഥ് താക്കൂറിനും മന്ത്രിസ്ഥാനം ലഭിച്ചേക്കും.
ടിഡിപി എംപിമാരായ ഡോ. ചന്ദ്രശേഖര്‍ പെമ്മസാനിക്കും റാം മോഹന്‍ നായിഡു കിഞ്ജരാപ്പുവിനും മോഡി 3.0 ല്‍ മന്ത്രിസ്ഥാനം ലഭിക്കുന്നുണ്ടെന്ന് പാര്‍ട്ടി നേതാവ് ജയ് ഗല്ല എക്സില്‍ അറിയിച്ചു.
Summary: There is still a frenzy of discussion in Delhi about how the Modi 3.0 team will fare. BJP sources had earlier taken a stand that no matter how much pressure from allies, they will not give up the critical portfolios of Home, Defence, Finance and External Affairs.
COMMENTS