വീട്ടിൽ അതിക്രമിച്ച് കയറി സ്ത്രീയുടെ വസ്ത്രം ഉയർത്താൻ ശ്രമിച്ചാൽ ബലാത്സംഗ ശ്രമമായി കാണാനാവില്ല: ജാർഖണ്ഡ് ഹൈക്കോടതി

റാഞ്ചി: രാത്രിയിൽ സ്ത്രീയുടെ വീട്ടിൽ അതിക്രമിച്ചുകയറി അവരുടെ വസ്ത്രം ഉയർത്താൻ ശ്രമിച്ചത് ക്രിമിനൽ കുറ്റമാണെങ്കിലും, അതിനെ ബലാത്സംഗ ശ്രമമായി ...

റാഞ്ചി: രാത്രിയിൽ സ്ത്രീയുടെ വീട്ടിൽ അതിക്രമിച്ചുകയറി അവരുടെ വസ്ത്രം ഉയർത്താൻ ശ്രമിച്ചത് ക്രിമിനൽ കുറ്റമാണെങ്കിലും, അതിനെ ബലാത്സംഗ ശ്രമമായി കണക്കാക്കാനാവില്ലെന്ന് ജാർഖണ്ഡ് ഹൈക്കോടതി. 

സ്ത്രീത്വത്തെ അപമാനിക്കാൻ ശ്രമിച്ചെന്ന കുറ്റമാണ് (IPC Section 354) ഇവിടെ നിലനിൽക്കുകയെന്നും കോടതി വ്യക്തമാക്കി.1999 ഡിസംബറിൽ കിഴക്കൻ സിംഗ്ഭൂം ജില്ലയിൽ നടന്ന കേസിൽ പ്രതിക്ക് കീഴ്ക്കോടതി ചുമത്തിയ ശിക്ഷ ഭേദഗതി ചെയ്തുകൊണ്ടാണ് ജസ്റ്റിസ് പ്രദീപ് കുമാർ ശ്രീവാസ്തവയുടെ സിംഗിൾ ബെഞ്ചിന്റെ ഈ നിർണായക ഉത്തരവ്.

ഒരു പ്രവൃത്തിയെ ബലാത്സംഗ ശ്രമമായി കണക്കാക്കണമെങ്കിൽ, ആ കുറ്റകൃത്യം നടപ്പിലാക്കാൻ പ്രതി പൂർണ്ണമായും തയ്യാറെടുത്തു എന്ന തരത്തിലുള്ള ശാരീരികമായ നീക്കങ്ങൾ ഉണ്ടാകേണ്ടതുണ്ട്. എന്നാൽ ഈ കേസിൽ വസ്ത്രം ഉയർത്താൻ ശ്രമിച്ചു എന്നതിനപ്പുറം അങ്ങനെയുള്ള യാതൊരു നീക്കവും തെളിയിക്കാൻ പ്രോസിക്യൂഷന് സാധിച്ചിട്ടില്ലെന്ന് കോടതി ചൂണ്ടിക്കാട്ടി.വീട്ടിൽ ഉറങ്ങിക്കിടക്കുകയായിരുന്ന സ്ത്രീയുടെ അരികിലേക്ക് അതിക്രമിച്ചുകയറിയ പ്രതി അവരുടെ വസ്ത്രം ഉയർത്താൻ ശ്രമിച്ചെന്നായിരുന്നു കേസ്. ഈ സംഭവത്തിൽ 2006-ൽ കീഴ്ക്കോടതി പ്രതിക്ക് നാല് വർഷത്തെ കഠിനതടവ് ശിക്ഷ വിധിച്ചിരുന്നു.

ഈ വിധിക്കെതിരെ പ്രതി നൽകിയ അപ്പീൽ പരിഗണിച്ചാണ് ഹൈക്കോടതി ശിക്ഷയിൽ മാറ്റം വരുത്തിയത്.ഇന്ത്യൻ ശിക്ഷാനിയമത്തിലെ 376/511 (ബലാത്സംഗ ശ്രമം) വകുപ്പുകൾ പ്രകാരമുള്ള ശിക്ഷ കോടതി റദ്ദാക്കി. പകരം ഐ.പി.സി 354 (സ്ത്രീത്വത്തെ അപമാനിക്കൽ), 456 (രാത്രിയിൽ അതിക്രമിച്ചുകയറൽ) എന്നീ വകുപ്പുകൾ പ്രകാരമുള്ള കുറ്റമാണ് നിലനിൽക്കുകയെന്ന് വ്യക്തമാക്കിയ കോടതി, പ്രതി മുൻപ് അനുഭവിച്ച 8 മാസത്തെ തടവ് ശിക്ഷ ഈ കുറ്റത്തിന് മതിയെന്ന് ഉത്തരവിടുകയും ചെയ്തു.

key words : Rape Attempt, Jharkhand High Court