രാഷ്ട്രപതി 22-ന് ശബരിമലയില്‍, സന്നിധാനത്തേക്ക് ഗൂര്‍ഖ ജീപ്പില്‍ പോയേക്കും, ഹൈക്കോടതിയുടെ അനുമതി തേടാന്‍ സംസ്ഥാനം

President Droupadi Murmu to Visit Sabarimala on October 22; Confusion over 'Special Vehicle' for Sannidhanam

 

സ്വന്തം ലേഖകന്‍

പത്തനംതിട്ട: രാഷ്ട്രപതി ദ്രൗപദി മുര്‍മു ഈ മാസം 22-ന് ശബരിമല ക്ഷേത്രത്തില്‍ ദര്‍ശനം നടത്തും. രാഷ്ട്രപതി പദവിയിലിരിക്കെ ശബരിമല സന്ദര്‍ശിക്കുന്ന ആദ്യത്തെ വ്യക്തിയാണ് ദ്രൗപദി മുര്‍മു. തുലാമാസ പൂജകളുടെ സമാപന ദിവസമാണ് സന്ദര്‍ശനം നിശ്ചയിച്ചിരിക്കുന്നത്.

രാഷ്ട്രപതി ഭവന്‍ നല്‍കിയ സന്ദര്‍ശന പരിപാടിയില്‍, പമ്പയില്‍ നിന്ന് സന്നിധാനത്തേക്ക് 'പ്രത്യേക വാഹനത്തില്‍' രാഷ്ട്രപതിയെ എത്തിക്കുമെന്ന് സൂചിപ്പിച്ചിട്ടുണ്ട്. ഗൂര്‍ഖ ജീപ്പില്‍ എത്തിക്കാനാണ് സംസ്ഥാന സര്‍ക്കാര്‍ ആലോചിക്കുന്നത്. 

എന്നാല്‍, ശബരിമലയില്‍ സന്നിധാനം വരെ വാഹനങ്ങള്‍ ഉപയോഗിക്കുന്നതിന് ഹൈക്കോടതിയുടെ കര്‍ശന നിയന്ത്രണങ്ങളുണ്ട്. നിലവില്‍ അത്യാവശ്യ ഘട്ടങ്ങളില്‍ രോഗികളെ കൊണ്ടുപോകാന്‍ ഗൂര്‍ഖ ആംബുലന്‍സ് ഉള്‍പ്പെടെയുള്ള ആംബുലന്‍സുകള്‍ക്ക് മാത്രമാണ് അനുമതിയുള്ളത്.

സുരക്ഷാ ആവശ്യങ്ങള്‍ക്കായി സൈനിക മോഡലിലുള്ള ഗൂര്‍ഖ ജീപ്പ് പോലുള്ള പ്രത്യേക വാഹനം ഉപയോഗിക്കാന്‍ രാഷ്ട്രപതി ഭവന്‍ തീരുമാനിച്ചാല്‍, അതിന് കേരള ഹൈക്കോടതിയുടെ പ്രത്യേക അനുമതി വാങ്ങേണ്ടിവരും. കൂടാതെ വാഹനമോടിക്കുന്നവര്‍ക്ക് എസ്.പി.ജിയുടെ അനുമതി നല്‍കുന്ന കാര്യത്തിലും വ്യക്തത ആവശ്യമാണ്.

നിലവില്‍ ഈ വിഷയത്തില്‍ രാഷ്ട്രപതി ഭവന്റെ അന്തിമ മറുപടിക്കായി സംസ്ഥാന സര്‍ക്കാര്‍ കാത്തിരിക്കുകയാണ്. ഒക്ടോബര്‍ 22 (ചൊവ്വ) ഉച്ചയ്ക്ക് 12 മണിയോടെ രാഷ്ട്രപതി നെടുമ്പാശ്ശേരിയില്‍ നിന്ന് ഹെലികോപ്റ്ററില്‍ നിലയ്ക്കല്‍ ബേസ് ക്യാമ്പില്‍ എത്തും. സുരക്ഷാ വിഭാഗമായ എസ്.പി.ജി.യുടെ നിര്‍ദ്ദേശമനുസരിച്ച്, കാല്‍നടയായി മലകയറുകയോ, പ്രത്യേക വാഹനത്തില്‍ യാത്ര ചെയ്യുകയോ, ഡോളി സൗകര്യം ഉപയോഗിക്കുകയോ ചെയ്യാം.

വൈകിട്ട് ദര്‍ശനത്തിനും വിശ്രമത്തിനും ശേഷം മലയിറങ്ങി രാത്രിയോടെ തിരുവനന്തപുരത്തേക്ക് തിരിക്കും.

സന്ദര്‍ശനം കണക്കിലെടുത്ത് ശബരിമലയിലും പരിസരങ്ങളിലും കനത്ത സുരക്ഷാ മുന്നൊരുക്കങ്ങള്‍ ദേവസ്വം ബോര്‍ഡും കേരള പോലീസും ചേര്‍ന്ന് ഒരുക്കുന്നുണ്ട്. രാഷ്ട്രപതിയുടെ സന്ദര്‍ശനത്തിന്റെ ഭാഗമായി ഒക്ടോബര്‍ 22-ന് ശബരിമലയില്‍ തീര്‍ത്ഥാടകര്‍ക്ക് ദര്‍ശനത്തില്‍ നിയന്ത്രണങ്ങള്‍ ഏര്‍പ്പെടുത്തിയിട്ടുണ്ട്.

ഒക്ടോബര്‍ 23-ന് രാഷ്ട്രപതി ശിവഗിരിയിലെത്തി ശ്രീനാരായണ ഗുരു മഹാസമാധി ശതാബ്ദി ആചരണത്തിന്റെ ഉദ്ഘാടനം നിര്‍വ്വഹിക്കും. 1973-ല്‍ മുന്‍ രാഷ്ട്രപതി വി.വി. ഗിരിയാണ് ഇതിനുമുമ്പ് ശബരിമല സന്ദര്‍ശിച്ച പ്രമുഖ രാഷ്ട്രതന്ത്രജ്ഞന്‍. അന്ന് അദ്ദേഹത്തെ പമ്പയില്‍ നിന്ന് ചൂരല്‍ കസേരയിലിരുത്തിയാണ് സന്നിധാനത്തേക്ക് കൊണ്ടുപോയത്.

Summary: President Droupadi Murmu to Visit Sabarimala on October 22; Confusion over 'Special Vehicle' for Sannidhanam