Search

വ്യാജ ഹര്‍ത്താലിന്റെ പേരില്‍ നടന്ന ആക്രമണം: നിരവധി പേര്‍ അറസ്റ്റില്‍


കാസര്‍കോട്: വ്യാജ ഹര്‍ത്താലിന്റെ പേരില്‍ നടത്തിയ ആക്രമസംഭവങ്ങളില്‍ ഉള്‍പ്പെട്ടവര്‍ക്ക് വേണ്ടി മലപ്പുറത്ത് തിരച്ചില്‍ തുടങ്ങി. കാസര്‍കോട് ജില്ലയുടെ വിവിധ ഭാഗങ്ങളില്‍ നടന്ന അക്രമങ്ങളെക്കുറിച്ച് ക്രൈംബ്രാഞ്ച് അന്വേഷണം നടത്തും. ഇതിന്റെ മുന്നോടിയായി കാസര്‍കോട്ടു നിന്നും 104 പേരെ കഴിഞ്ഞ ദിവസം പൊലീസ് അറസ്റ്റ് ചെയ്തിരുന്നു. ഇതില്‍ 51 പേരെ കോടതിയില്‍ ഹാജരാക്കി റിമാന്‍ഡ് ചെയ്തു.

കോഴിക്കോട് ജില്ലയില്‍ മൊത്തം 196 പേര്‍ അറസ്റ്റിലായിരുന്നു. കോഴിക്കോട് സിറ്റിയില്‍ മാത്രം 116 പേരെ പൊലീസ് പിടികൂടി. ഇതില്‍ 102 പേരെ കേസ് രജിസ്റ്റര്‍ ചെയ്ത് ജാമ്യത്തില്‍ വിട്ടു. ഗതാഗതം തടസ്സപ്പെടുത്തല്‍, പൊതുമുതല്‍ നശിപ്പിക്കല്‍ തുടങ്ങിയ വകുപ്പുകളാണ് അറസ്റ്റിലായവര്‍ക്കെതിരെ ചുമത്തിയിരിക്കുന്നത്.

വ്യാജ ഹര്‍ത്താലില്‍ പാലക്കാട് ജില്ലയില്‍ 250 ഓളം പേര്‍ അറസ്റ്റിലായിരുന്നു. ഇതില്‍ 92 പേര്‍ക്കെതിരെ ജാമ്യമില്ലാ വകുപ്പ് പ്രകാരമാണ് കേസെടുത്തിരിക്കുന്നത്. വ്യാജഹര്‍ത്താലിനെക്കുറിച്ച് വാട്‌സാപ്പ് ഗ്രൂപ്പുകള്‍ വഴി പ്രചാരണം നടത്തിയവര്‍ക്കെതിരെയും നടപടി ഉറപ്പാക്കുമെന്നും ജില്ലാ പൊലീസ് മേധാവി അറിയിച്ചു.

അതേസമയം കടകള്‍ക്ക് നേരെയുണ്ടായ ആക്രമങ്ങളില്‍ പ്രതിഷേധിച്ച് താനൂരില്‍ വ്യാപാരി വ്യവസായി ഏകോപന സമിതി ആഹ്വാനം ചെയ്ത ഹര്‍ത്താല്‍ പൂണ്ണമാണ്. വന്‍ പൊലീസ് സന്നാഹവും സ്ഥലത്തുണ്ട്.

കശ്മീരില്‍ പീഡനത്തിനിരയായി കൊല്ലപ്പെട്ട പെണ്‍കുട്ടിക്ക് നീതി ഉറപ്പാക്കാന്‍ എന്ന പേരില്‍ നടന്ന വ്യാജ ഹര്‍ത്താലില്‍ മലബാറില്‍ വ്യാപക ആക്രമണമാണ് നടന്നത്. ഹര്‍ത്താലിനിടെ നടന്ന ആക്രമസംഭവങ്ങളുടെയും ആളുകളെ ഭീഷണിപ്പെടുത്തുന്നതിന്റേയും മറ്റും ദൃശ്യങ്ങള്‍ ഇപ്പോള്‍ സോഷ്യല്‍ മീഡിയയില്‍ വൈറലായി പരക്കുകയാണ്. മലപ്പുറത്ത് താനൂര്‍, തിരൂര്‍, പരപ്പനങ്ങാടി മേഖലകളില്‍ അക്രമികളെ നേരിടാന്‍ പൊലീസ് നിരോധനാജ്ഞ പ്രഖ്യാപിച്ചിരിക്കുകയാണ്.

ഹര്‍ത്താല്‍ അനുകൂലികള്‍ കടകള്‍ തല്ലി തകര്‍ത്ത താനൂരില്‍ ബി.ജെ.പി അധ്യക്ഷന്‍ കുമ്മനം രാജശേഖരന്‍ ഇന്ന് സന്ദര്‍ശം നടത്തി. ഹര്‍ത്താലിനു ശേഷം തീരദേശ മേഖലയില്‍ പ്രകോപനപരമായ സന്ദേശങ്ങള്‍ പ്രചരിക്കുന്നത് നിരീക്ഷിച്ച് നടപടിയെടുക്കുമെന്ന് പൊലീസ് അറിയിച്ചു.





vyganews

Vyga Online portals Private Limited, is the leading force behind the first Government accredited news prtal in Kerala, www. vyganews.com. The legendary Malayalam laureate Mr. MT Vasudevan Nair lead Vyganews.com to the cyber space on 2009 March 15.


0 thoughts on “വ്യാജ ഹര്‍ത്താലിന്റെ പേരില്‍ നടന്ന ആക്രമണം: നിരവധി പേര്‍ അറസ്റ്റില്‍